काठमाडौँ, असोज । कोरोना भाइरसका गम्भीर सङ्क्रमितलाई उपचार गर्न सरकारले काठमाडौँमा उपत्यकामा १८१ आइसियु र ७६ भेन्टिलेटर भएको जनाएको छ ।
स्वास्थ्य तथा जनसङ्ख्या मन्त्रालयका आज नियमति पत्रकार सम्मेलनमा मन्त्रालयका प्रवक्ता डा जागेश्वर गौतमले तीमध्ये ८२ आइसियु श्यया र २७ वटा भेन्टिलेटरमा गम्भीर सङ्क्रमितको उपचार भइरहेको जानकारी दिए ।
उनका अनुसार अझै ९९ आइसियु र ४९ वटा भेन्टिलेर खाली नै रहेका छन् । अहिलेसम्म २३५ आइसियु र ४२ भेन्टिलेटरमा उपचार गराइरहेका छन । तीमध्ये वाग्मती प्रदेशमा १२८ आइसियु र ३० भेन्टिलेटरमा रहेका छन् ।
मुलुकभर दुई हजार ६०० आइसियु र ९०० भेन्टिलेटर रहेका छन । आज काठमाडौँ उपत्यकामा दुई हजार ५४० कोरोनाका सङ्क्रमित भेटिएका छन । उपत्यकामा अहिलेसम्म ३६ हजार ३११ सङ्क्रमित फेला परेका छन् ।
प्रवक्ता डा गौतमले कोभिड १९ अस्पताललाई कोरोनाको रोकथाम र नियन्त्रण गर्न पूर्ण तयारी राखेको जानकारी दिए ।
आकस्मिकसहित सबै सेवा पनि २४ घण्टा खुला गरिएको उनले बताए । उनले सामान्य लक्षण र लक्षण विहीन सङ्क्रमित मन्त्रालयले तोकेको मापदण्ड पुरा गरी घरकै आइसोलेसनमा बस्न अनुरोध गरे ।
मन्त्रालयले घरमा बस्न सम्भव नभएमा टोल फ्रि नं ११३३ नम्बरमा सम्र्पक गर्न र स्वास्थ्यमा कुनै समस्या भएका अस्पताल जान आग्रह गरेको छ ।
